BAGUIO CITY – Agsubli iti cage ti Igorot fighter a ni Jujeath Nagaowa kalpasan ti dua a tawen nga awan ti labanna iti uneg ti ring.
Kasaruno daytoy ti panakairaman ti nabigbig a “Bad Girl” iti event ti World Kickboxing League inton June 10 sadiay Hainan Ding’an Sports Stadium, China.
Makasango ti 31-year-old former boxing champion manipud Benguet ti fighter manipud Thailand a ni Kannika Bangnara para iti titulo ti World Mixed Martial Arts League Minimumweight World Champion.
Gandaten ni Nagaowa a nayonan ti 3-fight winning streak daytoy iti mix martial arts (MMA) kalpasan nga inabakna da Jeet Toshi ken Taroth Sam iti ONE Championship bayat nga inabakna ni Yuko Kiryu ti Japan iti World Series of Fighting idi 2016.
Maipalagip a sakbay a napan iti MMA ket maysa a boksingero ni Nagaowa nga agsansanay iti sidong ti nalatak a Highland Boxing Gym ken ditoy a napangabakanna ti WIBA International Light Flyweight Title idi 2015.
