BAGUIO CITY–Resrespetuen ni Ibaloi tribal leader Roger Sinot ti addang ti korte a panakaipaulog ti writ of preliminary injunction kontra iti panagtugawna kas Indigenous Peoples Mandatory Representative (IPMR) iti lokal a konseho ti siudad ti Baguio.
Immuna iti daytoy, impaulog ni Presiding Judge Cecilia Corazon Dulay-Archog ti Regional Trial Court – Branch 6 ti nasao a writ a rason tapnu saanen a makatugaw ni Sinot iti lokal a konseho ti siudad agingga a madesisyonan ti korte dagiti kaso wenno isyu a sangsangwen daytoy.
Nupay kasta, iti panakiyuman ti Bombo Radyo ket impetteng ni Sinot a gapu iti nagbalin nga addang ti korte ket naitantan manen dagiti prebilihiyo a maala kuma dagiti Indigenous Peoples no nagtugawen daytoy iti lokal a konseho.
Inyunay-unayna nga ag-uray laengen daytoy gaputa kalpasan dagiti isyu a maibatbato kenkuana ket daytoy latta ti mapaboran nga agtugaw kas IPMR.
Innayonna met a mismo nga iti City Hall ti pagtataudan ti mangliblibeg iti isyu iti panagtugawna kas IPMR ti siudad.
Kinunana pay a paset iti bileg dagiti adda iti takem ti panang-impluwensia iti hustisya a rason met tapnu saan a marisut ti isyu daytoy.
