Inlawlawag ni house Committee on Justice Chairperson Gerville Luistro a kasapulan ni sigud nga Ako Bicol Party-list Representative Elizaldy “Zaldy” Co nga agawid iti Pilipinas nu agtestigo daytoy iti impeachment complaints kontra kenni President Ferdinand Marcos Jr.
Sigun kenni Luistro, nakalanad iti pagalagadan para iti impeachment a kasapulan nga iti sangwanan iti Justice Committee ti pakaisapataan dagiti amin nga affidavits ken counter affidavits pakairamanan ti testimonya dagiti agtestigo.
Innayonna a dagiti amin nga ebidensya a mangsuporta iti impeachment complaint kontra iti presidente ket kasapulan a maisapata iti sangwanan ti nasao a komite.
Maipalagip a sipud immalis ni Co iti pagilian a Pilipinas ket saan pay a nagsubsubli iti baet a maidagdagadag ti panagawidna tapno sumango kadagiti akusasyon kontra kenkuana mainaig kadagiti naanomalyaan a flood control projects.
Maibasar met iti kaudian a panagwanawan dagiti maseknan nga ahensya, maatap nga agtaltalinaed iti uneg ti gated community idiay Portugal ni Co nga iti agdama ket addaanen ti arrest warrant.