BAGUIO CITY- Impannakel ti Baguio City Police Office ti zero election related incidents a nailista ti siudad kabayatan ti eleksion idi Mayo 9.
Iti interview ti Bombo Radyo Baguio kenni BCPO Public Information Office PLT.COL Judy Jasmin Palicos, inwaragawagna manen a natalinaay ti naipatungpal nga eleksion iti siudad.
Sigun kenkuana awan pulos ti nailista nga pangta wenno dagiti election related incidents sakbay, kabayatan ken kalpasan ti eleksion.
Karaman laeng kadagiti binantayanda nga parikot kabayatan ti eleksion ti panagpalya dagiti sumagmamano nga vote counting machines kadagiti 10 nga polling precints iti siudad a dagus met a natarimaan.
Malaksid iti dayta, tinututan ken naipaayanda met iti assistance dagiti botante a saanda nga mabirukan ti naganda iti listaan kadagiti polling precints.
Nupay kasta, dumanon met iti 8 nga indibidual ti napilaan iti kaso kalpasanda a naglabsing iti implementasyon ti COmelec Liqour Ban.
