Pakabuklan a ₱5,378,000 ti balor dagiti nadiskubre a marijuana kadagiti naipatungpal a marijuana eradication idi Biernes, December 5, 2025 kadagiti probinsya iti Benguet ken Kalinga.
Iti report iti Police Regional Office-Cordillera, tallo a plantasyon ti nadiskubre idiay Butbut Proper, Tinglayan, Kalinga a nakaimulaan iti 16,000 a pu-on iti fully grown marijuana plants nga agbalor iti ₱3,200,000.
Ti operasyon ket impatungpal iti nagtitipon a pwersa dagiti kameng iti 2nd Kalinga Provincial Mobile Force Company (PMFC), Tinglayan Municipal Police Station (MPS), Provincial Drug Enforcement Unit (PDEU), Provincial Intelligence Unit (PIU) iti Kalinga Police Provincial Office (PPO), ken ti Philippine Drug Enforcement Agency (PDEA)-Cordillera.
Iti met probinsya iti Benguet, uppat a plantasyon iti kapada a mula ti nadiskubre partikular kadagiti babbarangay iti Kayapa, Bakun, ken Badeo, Kibungan, Benguet.
Dumanon iti 7,210 a pu-on iti fully grown marijuana plants ken 18,400 a marijuana seedlings ti nadiskubre nga addaan iti Standard Drug Price a ₱2,178,000.
Ti operasyon ket impatungpal met iti nagtitipon a pwersa dagiti kameng iti 2nd Benguet Police Mobile Force Company, PIU/PDEU iti Benguet Police Provincial Office, Regional Intelligence Division iti Police Regional Office-Cordillera, Regional Intelligence Unit-14, ken ti Philippine Drug Enforcement Agency-Cordillera.
Amin dagiti nasao a mula ket pinarut ken inuram dagiti otoridad bayat nga agtultuloy latta ti imbestigasyon tapno masarakan pay dagiti daduma a plantasyon ken tapno matiliw dagiti adda iti likudan daytoy.
