BAGUIO CITY – Nasarakanen itay malem, Oktobre 31, ti bagi ti balasitang nga immunan a naipadamag a naiyanod iti Agno River sadiay Sitio Salapsap, Dalupirip, Itogon, Benguet idi pay Oktobre 23.
Nasarakan ti bangkay ni Colleen Chance Flores, 16-anyos, sadiay Pangbasan, Dalupirip kalpasan ti siyam nga aldaw a search and rescue operation.
Maipalagip nga idi malem ti Oktobre 23, nagpakada da Flores ken ti kabagyanna a ni Cherry Leigh Pangang-at, 15-anyos kadagiti nagannakda tapno apanda agdigus.
Ballasiwen koma dagitoy ti Agno River tapno apanda aglangoy iti bangir a karayan idi killaat a pimmigsa ti ayos ti danum rason a naiyanod dagitoy.
Naispal ni Cherry kalpasan nga adda ti dakkel a bato a nag-iggemanna bayat a naan-anay a naiyanod ni Colleen.
Kasaruno ti nasao nga insidente, imparikep ni Itogon Mayor Bernard Waclin ti nasao a karayan kadagiti bisita.
