BAGUIO CITY – Pimmusay ti 16-anyos nga ubing bayat a nadangran ti dua a kadwana nga agtawen iti 17 ken 15 kalpasan a natupakan ken naipit dagitoy iti concrete mixer sadiay Sitio Payda, Barangay Bayabas, Sablan, Benguet pasado alas kwatro idi malem kalman.
Maibasar iti report ti Sablan MPS, agdiskarga koma ti mixer truck ti semento a maaramat iti retaining wall idi killaat a nargaay ti kannawan a paset ti kalsada.
Gapu iti daytoy, natumba ti mixer truck ken natnag iti maar-aramid a retaining wall nga addaan kauneg a 10 metro rason a nagaburan dagiti agtrabtrabaho a biktima.
Nagpaut iti maysa nga oras sakbay a narekober ti bagi dagiti biktima ngem maysa kadagitoy ti naideklara a dead on the spot.
Naiturong met iti ospital dagiti dua a biktima ken ti driver ti mixer concrete nga iti agdama ket maag-agasan.
Agtultuloy met ti imbestigasyon nga ipatpatungpal dagiti otoridad iti napasamak nga insidente.
