𝐍𝐚𝐬𝐮𝐫𝐨𝐤 𝐏𝟓-𝐦𝐢𝐥𝐥𝐢𝐨𝐧 𝐭𝐢 𝐠𝐚𝐭𝐚𝐝𝐧𝐚 𝐚 𝐦𝐚𝐫𝐢𝐣𝐮𝐚𝐧𝐚, 𝐧𝐚𝐤𝐮𝐦𝐩𝐢𝐬𝐤𝐚𝐫 𝐬𝐚𝐝𝐢𝐚𝐲 𝐊𝐚𝐥𝐢𝐧𝐠𝐚

BAGUIO CITY – Sumango ti kaso a panaglabsing iti RA 9165 wenno ti Comprehensive Dangerous Drugs Act of 2002 kalpasan a ginandatna a mangibiahe ti marijuana bricks nga aggatad ti P5-million sadiay Kalinga.
Maibasar iti report, nabigbig ti suspek a ni Albert Borway Dugwawi, 29-anyos ken residente ti Brgy. Agbannawag, Tabuk City, Kalinga.
Sigun pay iti report, nakaawat dagiti personnel ti 2nd Kalinga Provincial Mobile Force (PMFC) ti impomasyon nga adda ti maysa nga indibidual a mangibiyahe ti marijuana products manipud Tinglayan paturong sadiay Tabuk City.
Dagus a nangipatungpal ti nagtipon a pwersa ti 2nd Kalinga PMFC, Tabuk City Police Station (CPS), Lubuagan MPS, ken Provincial Drug Enforcement Unit (PDEU) ti interdiction operation sadiay Sitio Dinacan, Brgy. Dangoy, Lubuagan, Kalinga.
Kabayatan ti checkpoint operation, pinartakan ti suspek a pinataray ti luganna paturong iti direksyon ti Pasil, Kalinga.
Kinamat dagiti otoridad ti lugan agingga a nadanonanda daytoy iti depaar ti Pasil-Balbalan Road a naabandona.
Iti inspeksyon, nadiskobre ti P5 million ti gatadna a marijuana ken dagus met a natiliw ti suspek sadiay Barangay Cagaluan, Pasil, Kalinga.
Addan ti suspek iti kustodiya ti Pasil MPS para iti dokumentasyon ken umno a disposisyon.