BAGUIO CITY – Nag uurnong dagiti umili ken opisyales ti Cordillera iti Melvin Jones, Baguio City tapno ipeksada ti suportada kenni Bureau of Corrections Director General Gerald Bantag.
Kasaruno daytoy ti panangsuspendir ni Department of Justice Secretary Jesus Remulla kenni BuCor General Bantag para iti imbestigasyon kalpasan a nairaman ti naganna kadagiti responsable iti ipupusay ti radio broadcaster a daydi Percy Lapid.
Karaman kadagiti dimmar-ay ket da Baguio City Mayor Benjamin Magalong, Councilor Benny Bomogao, Atty. Rocky Thomas Balisong, representative manipud iti nagduduma a tribu ken dadduma pay a sectoral group.
Agtalek dagitoy nga addaan iti nasayaat a panagpuspuso ni General Bantag isut gapuna a kidkiddawenda ti patas nga imbestigasyon tapno madusa dagiti nakabasol ken madalusan ti nagan dagiti inosente iti nasao a krimen.
Ni Bantag ket kailyan manipud Cordillera ken isuna ti kaunaan nga Igorot a nakagun-od ti 4-star General.
Nagserbi daytoy kas jail warden iti Manila City Jail sakbay nga inappointaran ni sigud a President Rodrigo Duterte kas Director-General ti Bureau of Corrections.
