BAGUIO CITY- Saan pay nga executory ti resolution ti COMELEC Second Division a mangkankanselar iti kandidatura ni Avelino Amangyen, maysa kandidato iti kina-mayor sadiay Paracelis, Mountain Province.
Inwaragawag daytoy ni Provincial Election Supervisor Richelle Mae Belmes ita nga aldaw ti Abril 21.
Immunan a kinanselar ti COMELEC Second Division ti kandidatura ni Amangyen gaputa saanna nga inlanad a na-kumbikataran iti maysa a kaso ken ti pannusa ditoy ti pannaka-diskwalipikarna nga agtaray ti aniaman a posision iti eleksion.
Naduktalan a nasentensiyaan ni Amangyen ti kaso a panaglabsing iti Presidential Decree 705 wenno ti Illegal Logging ken Qualified Theft idi Abril 11, 2018.
Maipalagip a siguden a nagserbi ni Amangyen kas mayor ti Paracelis, Mt Province.
