BAGUIO CITY – Iyap apela ti Baguio City Police Office ti panagtulnog dagiti umili ken bisita iti pagalagadan iti pannakaipatungpal ti checkpoint nangruna iti COMELEC Checkpoint ken gun ban.
Iti pannakiyuman ti Bombo Radyo Baguio ken BCPO Information Officer PLtCol. Judy Jasmine Palicos, addan iti uppat nga indibidual a natiliwda a naglabsing iti COMELEC gun ban.
Gapu iti dayta, kinunana nga agtultuloy iti panangipaayda iti ballaag iti publiko seknan iti implementasyonda iti daytoy.
Kabayatanna, inlawlawagna nga agtultuloy latta ti panangipatungpalda iti border checkpoint ditoy Baguio City iti baet ti pannakaipasidong ti syudad iti Alert Level 1 ken pannakapalukay dagiti nagduduma a restrictions.
Kinunana a nasken latta a maipasigurado a bakunado amin a sumrek iti syudad ken wagas metlaengen daytoy tapnu maipalagip kadagiti amin a sumrek dagiti paglintegan ken pagalagadan a masursurot ditoy Baguio City.
