Pakabuklan a ₱16.8million ti balor dagiti Fully Grown Marijuana Plants(FGMP) ti pinarut ken inuram dagiti kameng iti PNP-Philippine Drug Enforcement Group- Special Operations Unit-Cordillera (PNP PDEG-SOU CAR) kabayatan ti dua nga aldaw a panakaipatungpal ti “OPLAN GREENWATCH TRES” marijuana erdication operation iti Barangay Palina ken Barangay Poblacion, Kibungan, Benguet.
Maysa a plantasyon nga addaan kalawa a 400 metro cuadrado ti nadiskubre idiay Barangay Palina a namulaan iti agarop 4000 a pu-on iti FGMP nga agbalor iti ₱800,000.
Iti abay ti nasao a plantasyon, nadiskubre dagiti nasao nga operatiba ti maysa a kweba a sinukimatda metlaeng rason a nadiskubre ti agarop 50 a kilo ti dried marijuana leaves nga addaan met iti estimated Standard Drug Price a ₱6,000,000.
Idiay met Barangay Poblacion, dua a plantasyon ti nasarakan a patien dagiti otoridad a matartaripato gapu ta awan a pulos ti nakita dagitoy a ru-ot a ken naobserbaran a naaramatan ti “tiger grass stick” tapno saan a matumba dagiti mula nu dumakkel.
Ti umuna a plantasyon ket addaan land area a 2,000 metro cuadrado a namulaan iti agarop 20,000 a pu-on iti Fully Grown Marijuana Plants(FGMP) ken agbalor iti mapatta-patta a ₱4,000,000.
Dumanon met iti agarop 30,000 a pu-on iti kapada a mula ti maysa pay a plantasyon nga addaan kalawa a 3,000 metro cuadrado.
Addaan dagitoy iti Standard Drug Price a ₱6,000,000.
Nupay kasta, awan ti naarestarda a cultivator kadagiti amin a plantasyon kabayatan dagiti nasao nga operasyon.
Impatungpal daytoy ti nagtitipon a pwersa dagiti kameng iti PNP-Philippine Drug Enforcement Group- Special Operations Unit-Cordillera (PNP PDEG-SOU CAR) kas lead unit, Kibungan Municipal Police Station, PDEA- CAR Baguio- Benguet ken ti RPDEU-CAR.
Dagiti nasao nga operasyon ket paset ti kampanya kontra iligal a droga iti kapulisan.//Bombo Noveh Organo
