![](https://img.bomboradyo.com/baguio/2022/08/Smuggled-Sugar.jpg)
BAGUIO CITY – Nadiskobre ti ₱220 million a gatad ti imported nga asukar kabayatan ti panang-raid dagiti otoridad iti warehouses sadiay Pampanga ken Bulacan ita nga aldaw.
Sigun iti Bureau of Customs, 44,000 a sako ti imported nga asukar ti nasarakan dagiti personnel ti BOC, DA, DTI, Sugar Regulatory Administration, ken AFP iti warehouses.
Sigun met iti opisina ti Press Secretary, dagiti sako ti asukar a narekober sadiay Pampanga ket nagtaud manipud Thailand.
Malaksid kadagiti narekober iti warehouse, ginasgasut metlaeng a sako ti asukar ti narekober iti delivery vans.
Sigun kenni Press Secretary Trixie Cruz-Angeles, naipatungpal ti operation kalpasan a nakaawat dagiti otoridad ti intelligence report seknan iti posible nga smuggled nga asukar.
Im-imbestigaran met ita dagiti otoridad nu dagiti narekober nga imported nga asukar ket maysa a kita ti hoarding wenno maar-aramat para iti price manipulation.
Kabayatan ti operasyon ket nawanawanan ti presentia ti maysa a Chinese-Filipino warehouse keeper.
Gapu iti daytoy, nangipatungpal dagiti otoridad iti inspeksyon iti warehouse a tagikua ti Chinese-Filipino sugar trader Victor Chua sadiay Bulacan.
Nangitunda daytoy iti panakarekober ti 25,000 agingga 30,000 a sako ti nagduduma a klase ti asukar iti storage facility daytoy nu sadino impettengna a locally purchased dagitoy.
Immunan a na-raid idi Miyerkules ti 42,733 a sako ti asukar nga aggatad iti ₱215 million iti sabali a warehouse a tagikua metlaeng ni Chua.
Naimbitaran ni Chua iti San Jose Monte Police Station tapno sungbatanna dagiti saludsod kangrunaan ti kinakurang ti permit manipud iti SRA.