BAGUIO CITY- Nabigbig kas baro a World Boxing Council wenno WBC Asia Featherweight champion ni KJ Natuplag kalpasan nga inabak na babaen iti knockout ti kalaban daytoy iti main event ti Vic Boxing Promotions sadiay Dubai, UAE.
Nangabak ti Ifugao native a ni Natuplag kalpasan nga insardeng ti referee ti laban iti maikadwa a rikos gapu ta saanen a makatakder ti Thai Boxer a ni Attanon Kunlawong.
Sigun iti 25 anyos a boxer manipud Highland Boxing Gym, saan na a namnamaen nga agbanag iti KO iti panangabak na agsipud ta inkarigatan na pay a maka “survive” iti 1st round gapu iti nalak-am na a napipigsa a danug.
Innayon pay ti Igorot boxer, nagpaipasidong daytoy iti agarup dua a bulan a panagsanay ken nagsentro ti training daytoy tapno mapapigsa ti stamina, endurance ken nagduduma a boxing combination.
Nakasana met daytoy nu anya ti plano ti boxing promoter na nu kaano ti umuna a panangidepensa na iti titulo na wenno lumaban iti regular a WBC belt.
Awan met ti panggep daytoy nga agpangato iti nadagdagsen a weight category agsipud ta komportable daytoyen iti timbang na.
Pinagyaman pay ti sigud a Philippine Bantamweight champion dagiti indibidual ken grupo a timmulong kenkuana kabayatan ti training daytoy agsipud ta saan na a maigeddan ti panagbalin na a fitness ken boxing trainer sadiay Dubai kabayatan ti training camp.
Imet ita ni Natuplag ti 10 a panangabak, walo ditoy babaen iti knockout ken tallo a pannakaabak.
