Agtultuloy ti panagregget ti Benguet 2nd Provincial Mobile Force Company (Benguet 2nd PMFC) iti panangmintinir iti linak ken kapia, seguridad, ken counter-insurgency wenno anti-terrorism readiness iti probinsya.
Sigun kenni PLTCOL. Marvie Amilao, Force Commander ti Benguet 2nd Provincial Mobile Force Company, agtultuloy ti panangipatungpal dagitoy iti Internal Security Operations (ISO) Seminar para iti nasao a unit ti kapulisan tapnu ma-enhance ken saan a malipatan dagiti basics.
Maipalagip nga immunan a nangipatungpal dagitoy iti training kadagiti nagduduma a police stations iti Probinsya ti Benguet a saklaw ti Benguet 2nd PMFC seknan iti umno a panag-aresto, umno a pananghandle kadagiti naaresto ken dadduma pay.
Naaddaanda metlaeng kadagiti trainings ken seminars ita nga aldaw seknan iti ISO.
Maysa kadagiti panggep daytoy ket tapno mamintinir ti kapia ken talna nangruna ta naideklara kas insurgency free ti probinsiya.
Impeksa ni PLTCOL. Amilao a babaen ti pannaki-engage da iti kommumidad ken pannangidanun iti nagduduma a social services ti gobierno ket mapagtalinaed ti kapya ken talna no sadinno agserserbi kas rangtay ti kapulisan tapnu maammuan dagiti kasapulan ti komunidad.
Kabayatanna, kinuna ni PLTCOL. Amilao nga adda pay dagiti nasken nga idevelop wenno ma-improve kas iti safety and rescue procedures kas iti panagrescue ken drone operations.
Agyamyaman met ti nasao nga opisyal iti Provincial Local Government Unit (PLGU) gapu iti awan sarday a suportada kadagiti programa ken aktibidad ti kapulisan.
Iti sabali a bangir, impeksa ni Gov. Melchor Diclas a napateg launay ti napintas a partnership ken relasyon ti gobierno ken PNP nangruna iti panangbukel ti programa ken aktibidad para iti panangmintinir iti linak ken kapya kadagiti nagduduma a lugar.
Innayun pay daytoy a nasken metlaeng a masuportaran ti kapulisan nangruna iti logistics ken daduma pay a kasapulan ti PNP para iti napaspas a pangresponde ken dadduma pay.
Kabayatanna, malaksid iti bukod da a training ken seminars, agtultuloy metlaeng ti information campaigns, preventive mobile and foot patrols, checkpoint and border control, ken community engagement ti kapulisan. // via Bombo Vy Organo
