Natiliw ti sigud a konsehal ti Pasil, Kalinga ken kumankandidato iti kapada a posisyon bayat ti operasyon dagiti otoridad idiay Barangay Dagupan Weste, Tabuk City ita nga aldaw.
Ti suspek ket residente iti nasao metlaeng a lugar.
Natiliw daytoy babaen iti bileg ti warrant of arrest nga impaulog ti Regional Trial Court, Second Judicial Region, Branch 25.
Naala manipud kenkuana dagiti sumagmamano a pakete ti maatap a shabu, paltog ken bala.
Sumangsango ita ni Batalao iti kaso a panaglabsing iti Republic Act 9165, wenno ti Comprehensive Dangerous Drugs Act of 2002, ken illegal possession of firearms.
Maipalagip a natiliw metlaeng ni Batalao idi 2018 iti buy-bust operation gapu metlaeng iti kapada a kaso.
Saan paylaeng a nangiruar iti kanayonan a detalye dagiti otoridad maipapan iti gatad ti nakumpiskar nga iligal a droga ken nu anya a kita ti paltog ti nakumpiskar manipud iti suspek.
Iti agdama ket agtaltalinaed daytoy iti kustodiya ti pulisya bayat a maisagsagana ti kaso a maipila kontra kenkuana.
