BAGUIO CITY – Natalgeden ti kasasaad ti lalaki a nadangran iti napasamak a pammaltog iti maysa a panganan sadiay Bokawkan Road, Baguio City idi parbangon.
Segun iti Baguio City Police Office Station 2, natalgeden ni Nexon Palsi Cadoy, 20, tubo ti Bauko, Mt. Province ken residente ti Irisan, Baguio City.
Agpapaimbag daytoy ita iti Pines City Hospital kalpasan a nagsagrap iti tama ti paltog iti kannigid a luppo daytoy.
Immunan a pimmusay iti nasao a pammaltog ni Romeo Dulagan Pimentel Jr., 21, ken residente ti Botiwtiw, La Trinidad, Benguet.
Iti inisyal nga imbestigasyon ti pulisya ket nagsagrap daytoy iti dua a tama ti paltog iti tiyanna, ken naitaray pay iti Baguio General Hospital ngem naideklara a dead on arrival.
Maipalagip a mangmangan dagiti biktima iti nasao a panganan idi timmaud ti saanda a pinagkinaawatan iti suspek.
Pimmanaw ti suspek ngem kalpasan ti sumagmamano a minutos ket nagsubli daytoy nga adda ti imetna a paltog, ken pinalpaltoganna dagiti biktima sakbay a naglibas.
Iti agdama ket an-anopen dagiti otoridad ti nakalibas a suspek.
