BAGUIO CITY – Pimmusay ti maysa a barito bayat a nadangran ti kaduana kalpasan a natnag ti naglugananda a motorsiklo iti irrigation canal sadiay Naguirayan, Pidigan, Abra.
Nabigbig ti pimmusay a ni Ricardo Teneza Jr., 17-anyos, driver ti motorsiklo ken residente ti Suyo, Pidigan bayat a ti nadangran ket ti backrider a ni John Neria Claveria Sumulong, 16-anyos ken residente ti Pamutic, Pidigan.
Maibasar iti imbestigasyon ti pulisya, naggapo iti paginoman dagiti dua ken paturongda kuma iti Barangay Poblacion tapnu bisitaen ti maysa a gayyem dagitoy.
Nupay kasta, bayat nga agmanmaneho ni Teneza ket napukaw ti kontrolna iti motorsiklo a nangitunda iti panakatnagda iti rangtay agingga iti nasao a kanal nga addaan kauneg a tallo agingga lima a metro.
Nagsagrap dagiti dua iti dunor iti nagduduma a paset ti bagida ken naitarayda iti Abra Provincial Hospital ngem pimmusay ni Teneza bayat ti panakataming daytoy.
