BAGUIO CITY – Dumanon iti 10, 000 nga slice ti aramiden ti lokal a gobyerno ti La Trinidad, Benguet manipud iti giant strawberry cake a tampok iti Strawberry Festival ti nadakamat a munisipyo inton sumaruno a bulan.
Segun kenni Municipal Tourism Officer Valred Olsim, tampok ti giant strawberry cake inton Marso 19 ngem saan daytoy a kas kadakkel ti cake nga inaramidda idi 2004.
kinunana nga ilakoda ti tunggal slice ti cake iti sangapulo ket lima a pisos nangruna ta kasapulanda ti kanayunan a pondo para iti nagduduma a kompetisyon ken tapnu maguyugoy dagiti umili a makipaset kadagiti aktibidad.
Kabayatanna, kinunana a naragpat ti munisipyo ti La Trinidad, Benguet ti 3.5 milyon pisos a pondo a kasapulan para iti Strawberry Festival sadiay.
Kinunana a 3.2 milyon pisos ti binayadan ti nangabak a bidder ken daytoy ti inayunda iti nasurok kagudua a milyon a pisos a pondo ti tourism office.
