BAGUIO CITY – Dinadael dagiti otoridad ti dumanon 10 a cockfighting rings wenno pallutan manipud iti nagduduma a disso iti walo a munisipyo ti Benguet idi kalman.
Maibasar iti report ti Benguet Provincial Police Office (PPO), narakrak dagiti man-made makeshift cockfighting rings sadiay Buguias, Itogon, Tublay, Kapangan, Sablan, Atok, Tuba ken Mankayan.
Sigun iti pulisya, inuramda metlaeng dagiti materyales ti sumagmamano kadagiti nasao a pallutan.
Maar-aramat dagiti narakrak a pallutan iti non-bladed illegal cockfighting.
Nupay kasta, awan ti nakemmeg dagiti otoridad kadagiti insayangkatda nga operasyon.
Inlawlawag ti pulisya nga insayangkatda ti operasyon kas panangsuportarda iti kampanya ni PNP Chief PLtGen Archie Gamboa a panakaipasardeng ti aniaman a klase ti iligal a sugal ditoy bansa.
