BAGUIO CITY – Birbiruken ita dagiti otoridad ti lalaki a nanggandat a mangiserrek iti iligal a droga ken illegal drug paraphernalia iti uneg ti Baguio City Jail – Male Dormitory idi kalman.
Immuna iti daytoy, nadiskobre ken nakumpiskar dagiti jail guards ti 10 a pakete ti maatap a shabu manipud kadagiti karne ti adobo ken bakareta nga imet ti nasao a lalaki.
Iti interview ti Bombo Radyo Baguio kenni Jail Supt. Mary Ann Tresmanio, Jail Warden ti nasao a pagbaludan, kinunana a nadlawda a dadakkel bassit ti iwa dagiti sumagmamano a karne ti adobo ken bakareta nga imet ti nasao a lalaki isut gapuna a pinekkelda dagitoy.
Kinunana a nariknada nga adda ti naikabil iti uneg dagiti karne isut gapuna nga iniwada dagitoy ngem kabayatan ti panagiwada kadagiti karne ket killaat a timmaray paruar iti pagbaludan ti nasao a lalaki.
Kinamat daytoy dagiti dua a jail guards ngem napaayda a mangtiliw iti nasao a lalaki.
Nadiskobre met dagiti jail guards ti 10 a plastic sachets ti maatap a shabu kalpasan ti panangiwada kadagiti karne, pakairamanan ti dua a pakete a naglaon ti foil.
Iti agdama, ad-adalen dagiti otoridad dagiti video footages a naala ti CCTV camera ti pagbaludan a manamnama a makatulong iti imbestigayon ti insidente.
