BAGUIO CITY – Dumanon iti lima nga pasahero ti nadangran kalpasan ti panagdidinungpar ti lugan sadiay Sitio Sahava, Talor Sur Marcos Highway, Tuba, Benguet idi May 22.
Nabigbig dagiti nadangran a pasahero a da Marife Las-egan, Jazzleene Las-egan, Jaedeene Las-egan, Lourdes Billod ken ni Frances Billod.
Maibasar iti report ti pulisya, dinungpar ti maysa a van a nagluganan dagiti pasahero ti sinarunona a cargo jeep a killaat met a nagsardeng gapu iti killaat a panagsardeng ti sinarunona met a Ford Everest a lugan a kadwada nga mang-overtake iti maysa a truck.
Naamoan iti imbestigasyon a killaat a nagpreno ti driver ti Ford Everest a nabigbig a ni Carlito Cabanela Caramoan manipod Tuding, Itogon, Benguet tapnu maka-overtake ti maysa a nakamotorsiklo.
Gapu iti daytoy dagus met a nagpreno ni Anthony Manengyao Mapangdol driver ti cargo jeep a manipod Tadiangan, Tuba, Benguet ngem nadungparna ti Ford Everest.
Nagpreno metlaeng ni Franklin Agwilang Sawi, driver ti van ngem nadungaparna ti lugan ni Mapangdol rason iti panakadangran dagiti pasaherona.
Gapu iti napasamak a karambola, amin dagiti lugan ket napasar iti dadael.
Kagiddan iti dayta, agpalpagip manen dagiti otoridad kadagiti motorista iti panagannad ken liklikanda ti agovertake nangruna kadagiti narisgo wenno alanganin a paset ti kalsada.
Kabayatanna, nadangran ti lima pay nga indibidual kalpasan a natnag ti naglugananda a jeep idiay Baguio Gold, Tuding, Itogon, Benguet agsapa ti May 23.
Nabigbig dagitoy a da Rommel Apilado, 36 y/o, driver ti jeep; Jeremy Tomas, 24 anyos; Lefty Laoyan, 22 anyos; Joven Apilado, 28 anyos; Armando Apilado, 54 anyos, bin-ig a residente ti Baguio Gold Tuding, Itogon, Benguet.
Maibasar iti report, daldalyasaten ti jeep ti nasao a kalsada idi killaat a napukawan ti kontrol a nagresulta ti pannakatnagna iti rangkis nga addaan kauneg a 40 agingga 50 meters.
Dagos a naiturong iti pagagasan dagiti biktima.
