Dumanunen iti 109 a siudad ken munisipyo ti nangideklara iti state of calamity gapu iti epekto ti El Niño iti pagilian.
Sigun iti National Disaster Risk Reduction and Management Council (NDRRMC), kangrunaan a naapektaran ti Cagayan Valley a dumanon iti 66 a lokalidad, sinaruno ti Caraga a 23 ken Bicol Region a 12.
Maibasar iti datos ti Department of Agriculture, dumanon iti 451,889 nga indibidual ti apektado iti El Niño, bayat a P6.53 billion ti nadadael kadagiti produkto iti agrikultura.
Kabayatanna, naipaayan iti ayuda dagiti agarup 36,275 a pamiliya manipud iti 48,000 a bilang dagiti akidkiddaw iti tulong.
Sigun iti PAGASA, manamnama nga ad-adda a kumaro ti El Niño kadagiti sumarsaruno a bulan, a mangitundad iti tikag, pannakakissay ti tudo, panagngato ti temperatura ken dadduma pay.
