BAGUIO CITY – Nailista ti kanayonan a 11 a kaso ken 16 a recoveries ti COVID-19 iti rehion Cordillera idi kalman, August 8.
Maibasar iti kaudian a datus ti Department of Health-Cordillera, pito ti kanayunan a pasyente ti COVID-19 ditoy siudad ti Baguio bayat a tallo sadiay Apayao ken maysa iti Abra.
Naamuan a dagiti pasyente ditoy Baguio City ket manipud sadiay Cresencia Village, Dominican Hill, Camp 8, Middle Rock Quarry ken MRR Queen of Peace.
Sadiay met Apayao, dagiti tallo a pasyente ke bin-ig a residente ti Pudtol ken Sta. Marcela bayat a residente iti Zone 7, Bangued ti kanayuna a pasyente ti probinsia ti Abra.
Kabayatana, naimbagan manipud iti virus ti uppat a pasyente sadiay Kalinga bayat a tallo sadiay Ifugao ken saggaysa iti probinsia ti Benguet ken Mt. Province.
Mainaig iti daytoy, winaswasen ni Baguio City Mayor Benjamin Magalong ti lockdown iti barangay Pinget; Pinsao Pilot; Concepcion Drive; Camp 7; Loakan; Salud Mitra ken Kias idi kalman.
Ipalpalagip manen ti lokal a gobyerno ti siudad ti city-wide lockdown ita nga aldaw ti Domingo para iti contact tracing ken disinfection.
Iti agdama ket dumanonen iti 368 ti pakabuklan a kaso ti COVID-19 iti intero a rehion Cordillera no sadino 128 dagiti agpatpataming iti pagagasan bayat a 234 dagiti naimbagan ken innem ti pimmusay.
