BAGUIO CITY – Nagsublin iti trabaho dagiti 15 a pulis sadiay probinsia ti Benguet a nakaptan ti COVID-19 kalpasan a naimbagan dagitoy.
Sigun kenni PCol. Elmer Ragay, dadaulo ti Benguet Provincial Police Office, manipud iti nasao a bilang, innem laeng ti personnel ti Benguet Police bayat a dagiti dadduma ket nakadestino iti dadduma nga yunit kas iti Criminal Investigation and Detection Group ken Special Action Force ken dagiti naidestino iti La Trinidad Vegetable Trading Post ken iti Benguet Agri-Pinoy Trading Center.
Kinunana a saan a maliklikan a nakaptan iti COVID-19 dagiti nasao a pulis gaputa frontliners dagitoy ken karamanda kadagiti umuna a nakalinlinangen dagiti gumatgatang ti nateng nga agtataud kadagiti high-risk areas iti COVID-19.
Innayonna nga adda metlaeng dagiti Locally Stranded Indiviudals ken returning OFWs a nakapulpulapol dagitoy.
Inkari pay ni Col. Ragay nga agtultuloy ti panangbantay ti Benguet Police iti salun-at dagiti amin a personnel daytoy ken kanayon ti panangipalagipda iti panagtungpal dagitoy iti minimum public health standard kontra iti COVID-19.
