BAGUIO-Dumanon iti sangapulo ket maysa nga Overseas Filipino Workers dagiti nakaptan iti coronavirus disease 2019 sadiay Oman bayat a maysa ti pimmusay iti nasao a virus.
Iti interview ti Bombo Radyo kenni Attorney Gregorio Abalos, Labor Attache sadiay Oman , kinunana a manipud iti sangapulo ket maysa a nakaptan, lima kadakuada ket nakarekoberen.
Nupay kasta, ti pimmusay a Pinoy sadiay ket na-cremate ken urayenda paylaeng nga agnormal ti kasasaad tapno maiyawidda ti na-cremate a bangkay ti nasao nga OFW.
Mainaig iti daytoy, adda ti maawat dagiti OWWA members a nakaptan iti covid nga $200 , bayat nga imun-una ti Oman a nakaawat ti DOLE-AKAP a tulong pinansyal kadagiti OFW a naapektaran.
Inlawlawagna nga iti kanito nga adda manen ti ipatulod ti gobyerno ti Pilipinas ket maipaayan dagiti saan pay a nakaawat ti nasao a tulong pinansyal.
Dinakamatna a nagrugi ti lockdown-da sadiay idi paylaeng Marso iti baet a winaswasda ti lockdowdn sadiay idi napalabas a lawas ngem nainget ladta ti pagalagadan da sadiay.
Kinunana nga agmulta dagiti matiliwanda nga aglabsing kadagiti pagalagadan sadiay bayat nga ibalbalakadna kadagiti OFW sadiay iti panangsurot ladta iti social distancing, panangaramat ti facemask ken daduma pay.
KABAYATANNA, adu ladta dagiti naapektaran nga Overseas Filipino Workers manipud Pilipinas sadiay Oman.
Kinuna ni Abalos nga adda ti umuna a repatriation programda ita nga aldaw nu sadinu adda ti naituding nga agawid nga OFWs ditoy Pilipinas.
Mangnamnama daytoy a makaalada iti daduma nga schedule para iti sumaruno a batch nga agawid iti pagilian iti baet a nakarikep dagiti airports sadiay.
Dumanon met iti 289 nga OFWs ti agawid ditoy Pilipinas ita nga aldaw nu sadinu kasapulan ladta a surutenda dagiti pagalagadan kas iti social distancing kend daduma pay.
Kinunana a dagiti nasao nga agawid nga OFWs ket naawanan iti trabaho gapu iti covid-19 pandemic kalpasan iti panangisayangkatda iti survey kadakuada nangruna dagiti addaan ti sakit, agdadagsen, ken daduma pay para iti kaskenan a tulong.
Innayona nga adu dagiti nakapila a tarigagayda nga agawid ditoy pagilian gaputa naka-reschedule ti naituding kuma nga agawid dagitot idi June 3 ken June 10 ngem kasapulan a surutenda ti sistema iti NAIA ditoy Pilipinas.
Dinakatmatna nga aktibo dagiti kailyan sadiay iti panangipaayda iti tulong nangruna iti embahada ti Pilipinas sadiay iti panangipaayda ti tulong kas iti reliefs kadakuada iti baet a limitado ti pondo dagitoy.
Malaksid iti daytoy nangipaay met ti Indian Family ken negosyante manipud Oman a nangiwaras iti tulong kadagiti Pinoy sadiay.
VC ABALOS [PASET TI PANARITA NI ATTORNEY GREGORIO ABALOS, LABOR ATTACHE SADIAY OMAN]
