Maiwaras ti nasurok 111,000 a kameng ti pulisya tapno masigurado ti kinatalged ti publiko bayat ti pannakarambak ti Undas inton Nobiembre 1 ken 2 iti intero a pagilian.
Sigun iti Department of the Interior and Local Government (DILG), dumanon iti 111,582 a kameng ti pulisya ti maideploy iti 5,628 a sementerio ken columbarium.
Nangatngato no idilig iti 50,000 nga opisial a naidestino idi napalabas a tawen.
Agbantay metlaeng dagiti otoridad kadagiti terminal, transport hub, mall, ken resort.
Mangisayangkat metlaeng dagitoy iti panagpatrolia kadagiti residensial areas tapno malapdan ti panagtakaw kadagiti pagtaengan.
Kabayatanna, tumulong iti security ken traffic management dagiti nasurok 31,000 a force multiplier, pakairamanan dagiti barangay ken local government personnel.
Manamnama nga adu a Pilipino ti agbiahe iti bukodda a probinsia para iti nasao nga Undas.
