BAGUIO CITY -Naituding nga agnumar iti Service Contracting Program ti Land Transportation Franchising Regulatory Board (LTFRB) ti dumanon iti 1,116 a drivers dagiti parapubliko a lugan ditoy rehion Cordillera a mangbukbukel iti nasurok 69 nga accredited transport cooperatives ken nasurok 3 nga accredited transport corporations.
Maibasar iti rekord ti LTFRB-Cordillera, 681 a drivers iti rehion ti nakaawaten iti initial pay out dagitoy a nakaipalusposan ti P2.724-M ken 456 a drivers ti nang-activate iti sim cards dagitoy para iti nasao a programa.
Maipalagip nga iti kaudian a pammilin ket nanayonan ti insentibo a mabalin a maawat dagiti benipisaryo a drivers iti Service Contracting Program.
Naamuan nga iti rehion ket dumanon iti 108 a drivers dagiti parapubliko a lugan a benipisaryo iti programa ti nakaawat iti kanayonan nga insentibo a maitunos iti inisyatibo ti LTFRB tapnu maipaayan iti tulong pinansial dagiti agtatrabaho iti public transport sector a naapektaran met iti agdama a pandemya.
