BAGUIO CITY – Maimatangan manen ti naidumduma a sala dagiti residente sadiay Kabayan, Benguet iti panakarambak ti maika-119th a founding anniversary ken maikatlo a ‘Killing Festival’ ti nasao a munisipyo inton Nobyembre 28.
Sigun kenni Kabayan Mayor Faustino Aquisan, ti naidumduma a sala ket aw-awaganda a killing dance ken dito a tuladenda ti garaw ken uni ti nasao a billit a masarakan iti mossy forest ti Kabayan.
Ramrambakan ti Kabayan ti Killing Festival kas pammadayaw iti Siberian Rubythroat wenno ‘killing’ a maysa a red-necked bird nga agserserbi a basaran dagiti mannalon ti bagas iti panagsagana dagitoy para iti sumaruno a panagmula.
Sigun kenni Mayor Aquisan, maiparang ti sala dagiti billit babaen iti lima a grupo dagiti estudyante sadiay iti killing dance competition.
Dinakamatna a ti mangabak iti nasao a pasala ket ibagida ti Kabayan iti street dance competition ti Panagbenga ti Baguio ken iti Aliwan festival.
Kinuna pay ti mayor a bigbigbigenda dagiti killing gapu iti agtultuloy a koneksion wenno akem dagitoy iti wagas ti panagbiag ken iti planting season ti Kabayan.
Agserserbi ti Killing Festival kas highlight ti tallo nga aldaw a selebrasyon ti founding anniversary ti munisipyo.
Maibasar iti sarsarita, natiliw ti maysa nga utot ti maysa a killing ngem idi patayen kuma ti utot ti killing ket dinamagna no apay a nalabbaga ti ayan ti karabukob ti billit.
Insungbat ti killing nga iniwana ti paset ti karabukobna tapnu mapagbalin a nalabbaga ti marisna.
Dagus met nga inruar ti utot ti kutsilyona ken iniwana ti karabukobna a nagresulta iti ipupusayna.
Inlawlawag ni Mayor Aquisan a ti billit a killing ti mangisimsimbolo iti abilidad a mangsirib iti kalaban.
