BAGUIO CITY – Nakappia a nagleppas ti tension sadiay Pilar Abra kalpasan dagiti serye ti negosasion nga impatungpal ti PROCOR nga idadauloan ni PBGEN Ronald Oliver Lee.
Simmuko iti Philippine Army dagiti 12 a sigud a kameng ti militar a nagserbi kas security aides ni Vice Mayor Jaja Josefina Disono.
Naipaima met iti PNP dagiti sangapulo ket uppat a lisensiado nga armas manipud iti kampo ti nasao a bise mayor para iti forensic examination.
Maipalagip nga idi Marso 29 ket adda ti napasamak a pammaltog sadiay Pilar, Abra a nakairamanan dagiti simmuko a security aides ken nakatayan ti maysa a kadwa dagitoy.
Kasaruno daytoy ti maatap a panaglibasda iti maipatpatungpal a PNP-COMELEC Checkpoint babaen iti puraw a van a nangitunda iti panangkamat kadakuada dagiti otoridad.
Naamoan a nagpaputok dagitoy ti paltog rason a nakipinnaltog met dagiti otoridad agingga a nagturong ti puraw a van iti pagtaengan ni vice mayor Disono.
Kinurdon met ti pulisya ti nasao a compound para iti panakaipatungpal ti negosasion ken imbestigasion.
Narekober dagiti otoridad iti crime scene ti .9mm Stribog SP9A3, magazine nga addaan ti 20 a pidaso ti live ammunition ken identification card ni SANDEE BOY BERMUDO, ti pimmusay nga indibidual a maatap a bodyguard ti bise mayor.
Inkalintegan met ti bise mayor nga adda ti pakainnaigan ti napasamak nga insidente iti masungad nga eleksyon.
