Manarimaan paylaeng ti panakaipatungpal iti imbestigasyon iti napasamak nga “indiscriminate firing” idiay Bulanao, Tabuk City idi laeng kalman a nakadangran iti agtawen iti dose nga estudyante.
Sigun iti report, bayat a paawid ti biktima ken dagiti kadwa daytoy pasado alas cuatro iti malem iti nadakamat nga aldaw, nakangngeg dagitoy ti kanalbo-ong ti paltog.
Kasaruno dayta, nadlaw ti biktima nga agar-arubos ti dara iti ramay ken luppona nu sadino, dagus met nga inarayat daytoy dagiti kakadwana a sumagmamano laeng a metro nga adda iti likudanna.
Dagus met a naitaray ti biktima iti Kalinga Provincial Hospital.
Mainaig iti dayta, inlawlawag ni Kalinga Police Provincial Information Officer Ruff Manganip iti maysa nga interview a ti nadakamat nga insidente ket awan ti pakainaiganna iti tribal conflict gapu ta saan a naigagara a matamaan ti biktima iti bala iti paltog.
Kabayatanna, manarimaan paylaeng ti panagpatameng ti biktima iti nadakamat a pagagasan.
