Nangipatulod ti Department of Agriculture iti 18 a trucks tapno iwaras iti merkado iti Metro Manila ti nateng a nagtaud iti probinsia ti Benguet, kalpasan ti oversupplay a nangitunda iti rigat kadagiti lokal a mannalon, sigun kenni Secretary Francisco Tiu Laurel Jr..
Karaman kadagiti truck ti kukua iti DA, regional units, ken dagiti kooperatiba. Sinuportaran met iti departamento iti panaggastos iti gasolina tapno madanon ti trading hubs ti apit.
Sigun kenni Tiu Laurel, bayat a saan a dagos a marisut ti pakaseknan, makatulong ti baro nga addang iti dagos a pannakarisut ti oversupply iti nateng ken panangliklik iti pannakalugi dagiti mannalon.
Nakapokus metlaeng ti DA iti panangibangon iti Mega Cold Storage ken modular storage units tapno temporario a pangikabilan iti apit, kasta metten iti panangpapigsa iti supply chain babaen iti Kadiwa ng Pangulo site ken dadduma pay a merkado iti Metro Manila.
Inkari metlaeng ni Laurel ti personal a panagbisitana iti siudad ti Baguio ken La Trinidad tapno masigurado ti dagos a tulong kadagiti mannalon.
