Maiturong iti Metro Manila para iti imbestigasyon ti pre-shaded a balota a nadiskubre iti 36 a precincts sadiay Maluso, Basilan.
Imbilin ni acting provincial election supervisor Miguel Dela Pena a maidulin ken maipaima dagiti pre-shaded ballots kenni director Vergil Soriano a Basilan senior staff monitor.
Nabilin metlaeng ni Soriano nga ipaimana dagiti pre-shaded a balota iti law department ti Comelec sadiay Intramuros Manila, saan a naladladaw ngem Setiembre 17.
Sigun kenni Comelec chairperson George Garcia, nalpasen ti Maluso Municipal Board of Canvassers ti canvass dagiti 68 a precincts, pakairamanan ti 36 a polling precincts, bayat nga agtultuloy ti transmission.
Immunan a kinuna ni Comelec spokesperson John Rex Laudiangco a sumango iti electoral sabotage charges dagiti indibidual iti likudan ti pre-shading dagiti balota iti 36 a polling precincts sadiay Maluso, Basilan.
Nabigbigen dagiti otoridad dagiti kandidato a nairaman kadagiti nasao a pre-shaded ballot incidents.
