BAGUIO CITY – Nagresulta iti panagkarambola ti 12 a lugan ken panakadangran ti tallo a dadduma pay ti panaka-aksidente ti maysa a 10-wheeler forward truck sadiay Lower Buhagan Road, ditoy siudad ti Baguio idi rabii.
Nabigbig ti driver ti nasao a truck nga addaan plaka a CSP 131 a ni Salvador Wakit Martin, 47-anyos a residente ti Yagyagan, Tuba, Benguet ken kaduana iti lugan ti 15-anyos nga anak daytoy.
Sigun iti Baguio City Police Office, pasalog iti nasao a kalsada ti trak a naglaon kadagiti cement bags paturong kuma iti Camdas Barangay idi killaat a naaddaan ti loose break.
Nangitunda daytoy iti napartak a panagsalog ti trak iti kalsada agingga a naidungpar iti maysa a nakaparada a pick-up ken natumba iti kalsada.
Gapu iti kapigsa ti impact, nadungpar met ti agparada kuma a fortuner a nakadangran ti driver a ni Jude William Gawigaoen, 23-anyos ken ti pasahero daytoy a ni Aldrin Wagsingan Lagasca, 23-anyos.
Nagresulta pay ti insidente iti nagsasaruno a panagdidinnungpar ti maysa a sedan, dua a tamaraw fx, dua a taxi, maysa a revo wagon, maysa a double pick-up, maysa a montero ken maysa a motorsiklo.
Naitaray pay iti pagagasan ti siyam a bulan a masikog a ni Rhea Joy Tuazon Mariano, 32-anyos ken maysa nga storekeeper.
Manarimaan met ti panakadalus ti nasao a lugar manipud kadagiti naiwara a cement bags.
