Inwaragawag ti Energy Regulatory Commission (ERC), a posible a makisayyan ti singir iti kuryente gapu iti pannakaikat ti 12% value added tax (VAT) iti allowable system loss chargers dagiti power utilty.
Sigun iti nasao nga ahensya, nakipatang daytoy kadagiti stakeholders iti napalabas a lawas tapno tarimaanen dagiti mekanismo para iti panangipatungpal kadagit baro a pagalagadan ti Bureau of Internal Revenue (BIR).
Impetteng met ni ERC Chairperson Francis Saturnino Juan a puntiryada a maipatungpal ti panangikat iti VAT iti system loss charge para iti konsumo iti kuryente iti bulan ti Oktobre, a makita dagitoy iti bill da a maipaay inton bulan ti Nobyembre.
Iti sidung ti Revenue Memorandum Circular No. 97-2026 ti BIR a naipaulog iti Setyembre 14, saanen a mapatawan iti 12% VAT ti system loss charge a saklawen ti limitasyon nga intuding ti nasao nga ahensya.
Ibilbilang metlaengen ti BIR ti nasao a singir kas government-mandated pass-through cost, isu’t gapunna a saanen daytoy a maipasidung iti VAT.
Iti baet dayta, inlawlawag ti ERC a ti laeng VAT iti system loss charge ti maikat ken saan a ti mismo a system loss charge.
Ti system loss charge ti gastos iti kuryente a maaw-awan bayat a maipapaay ti enerhiya manipud iti power system. Sabali manen daytoy iti generation, transmission ken distribution charges a regular a makitkita kadagiti electricity bill.
Sigun kenni Juan, saan a mabalin a maikat ti VAT kadagiti dadduma pay a paset ti electric bill gapu ita saklaw daytoy kadagiti linteg ti pagilian.
Mapatt-patta a dumanon iti P20 agingga P30 ti VAT Component ti system loss charge a mabalin a maikissay iti bill dagiti konsyumer.
Impeksa melaeng ti nasao nga ahensya nga agtultuloy ita ti pannakikoordinarda kadagiti stakeholders tapno masigurado ti naurnos ken aggigidan a panangipatungpal iti nasao a direktiba kadagiti amin a power utility iti pagilian.
