Impila ni Senator Bam Aquino idiay Senado ti maysa a gakat a mangkidkiddaw a maibaba ti value-added tax (VAT) manipud 12% agingga 10% kadagiti produkto ken serbisyo, pakairaman ti produkto a petrolyo.
Panggep ti nasao a gakat a makissayan ti epekto na ti panagngato ti presyo dagiti gagatangen nangangruna para kadagiti “middle class” a saan a karaman iti direkta a benepisyaryo kadagiti ayuda ti gobyerno.
Sigun kenni Senator Aquino, ti panangkissay ti Value Added Tax ket mabalin nga agresulta iti nababa a presyo dagiti kangrunaan a gagatangen, a mangited iti kanayunan nga oportunidad kadagiti pamilya tapno maipaay dagiti innaldaw a kasapulanda.
Sigun met iti Department of Energy (DOE), mabalin nga agpaot ti innem a bulan agingga maysa a tawen ti epekto ti mannarimaan a krisis iti presyo ti produkto a petrolyo no sadino direkta a mang apapektar iti transportasyon, produksyon, ken presyo dagiti makan.
Iti sidung ti maisingsingasing a gakat wenno Senate Bill No. 2047, manamnama ti adaddu pay a kita a mabati para kadagiti umuli a mabalinda nga aramaten kadagiti kangrunaan a gagatangen.
Nupay kasta, impetteng ti senador ti importansya ti panangkolekta at panangaramat iti buwis tapno masigurado a saan a masayang ti pundo ti gobyerno ken mailatang ti pundo kadagiti programa a mangtulong iti publiko.
Iti agdama, manamnama a matalantan ti nasao a singasing iti Senado kas paset iti addang ti gobyerno tapno masolusyonan ti epekto ti agtultuloy a presyo ti petrolyo ken dadduma pay a gagatangen. //bombokaren.c.s
