Nasarakanen idi April 08 ti bangkay ti 13-anyos nga ubing a nalmes iti paset ti Pija River, Tattulao Hucab, Ifugao idi April 05 iti agdama a tawen.
Iti phone interview iti Bombo Radyo iti maysa nga opisial iti Kiangan Munisipal Police Station, kinunana a nasarakan ti bangkay ti ubing iti Sitio Nammug, Barangay Hapid Lamut, Ifugao.
Sigun kenkuana adayo daytoy manipud iti nakalmesan ti biktima.
Immuna metten a nabigbig a ti nasao a biktima ket residente metlaeng iti nasao a lugar.
Maipalagip nga iti interview ti Bombo Radyo kenni PSMS Christopher Dulagan iti Kiangan Municipal Police Station, kinunana a nagturung ti biktima ken dagiti kakadwana iti nasao a karayan tapno agdigus.
Nupay kasta, naiguyud ti biktima gapu iti napigsa nga ayus ti danum.
Maibasar metlaeng iti inisyal nga imbestigasion dagiti otoridad, saan nga ammo ti biktima nga aglangoy.
Immuna metteng a nagpalagip ni PSMS Dulagan kadagiti indibidual nga agturong iti nasao a karayan nga agannadda kasta met a kidkiddawenna kadagiti nagannak a bantayanda dagiti annak dagitoy tapno maliklikan ti kapada nga insidente.//mp4
