Malamlamayan iti agdama ti bagi ti 13-anyos nga ubing kalpasan ti panakatnag daytoy iti creek ti Imelda Village Barangay, Baguio City.
Iti eksklusibo a panakiuman ti Bombo Radyo kenni Roberto B. Bakisan, Barangay Kagawad ti Imelda Village, impakaamona a ti rason ti ipupusay daytoy ket gapu iti panakalnedna kabayatan ti pananggandatda a panagtakaw.
Sigun kenni Bakisan, nakita ti testigo ti dua nga ubbing a mang-alala iti bisiklita.
Nu pay kasta, kalpasan dagiti sumagmamano a minutos ket agar-arayat iti tulong ti ubing gapu ta natnag daytoy iti karayan.
Ngem, saanna a dagus a natulongan daytoy gapu ta narigat ti dalan iti karayan.
Maibasar iti CCTV, pasado alas dies a napasamak ti insidente ken ditoy a nakiddaw ti tulong dagiti nagduduma nga ahensiya kas iti 911, Philippine National Police, Baguio Fire Station ken daduma pay.
Kinuna ni Bakisan nga iti oras nga 11:45 ti agsapa ket naretrive ti bagi ti ubing.
Saan pay met a klaro nu ti nasao nga ubing laeng ti naiyanod gapu ta saan pay nga ammo ti napasamak iti kadua daytoy.
Ngem, kinuna ti testigo a nakitana ti maysa nga ubing a timmaray.
Iti napasamak nga insidente, kidddaw ti barangay kagawad ti panakabackfill ti karayan tapno saan a maulit daytoy.
Impeksana pay ti panangipaay iti atensyon dagiti ubbing iti panagadal dagitoy ken ti saan a panagwalwal kasta met ti panagpilida iti barkada.
Kabayatanna, makipagladladingit ti Imelda Village Barangay iti napasamak iti ubing.
