JUST IN: Manarimaan ti demolisyon kadagiti iligal nga istruktura iti Puguis Communal Forest#illegalstructure#demolition#PuguisCommunalForest#BastaRadyo#BomboRadyo pic.twitter.com/MWyTvXnPW9
— Bombo Radyo Baguio (@BaguioBombo) March 5, 2020
BAGUIO CITY – Nagbalin nga emosional dagiti claimants kabayatan ti pannakarakrak dagiti babablayda sadiay Puguis Communal Forest sadiay LongLong, La Trinidad, Benguet idi kalman.
Sagudayen ti demolition order ni La Trinidad Mayor Romeo Salda ket narakrak ti 13 nga iligal nga istruktura a naibangon iti nasao a communal forest.
Sigun iti maysa a claimant, addaanda iti papeles a pammaneknek nga idi paylaeng 1998 ket naikabilen iti naganda ti nasao a daga.
Gapu iti daytoy, kinuwestionaranna no apay a saan a respetuen ti lokal a gobyerno ti La Trinidad ti nasao a dokumento ken no apay a ti pagayatan ti lokal a gobyerno ti natungpal iti nasao a demolisyon wenno iti panakapapanaw dagitoy.
Kinuna met ti maysa pay a residente sadiay a saan a maiparbeng ti demolision gapu ta nabayagen dagitoy a residente iti Communal Forest.
Innayonna a nagtungpal dagiti pamilya a claimants iti pammilin nga awan ti magaraw iti nasao a disso bayat a matingtingiting ti kaso isut gapuna a kinuwestionaranna ti nasao a demolisyon.
Iti baet nga emosional dagiti claimants ket saan dagitoy a limmaban kadagiti indibidual a nangipatungpal iti demolision.
Inlawlawag met ni Atty. Bartolome Baldas Jr., Municipal Legal Officer ti La Trinidad a ti demolisyon ket babaen iti bileg ti demolition order nga impaulog ni Mayor Romeo Salda idi napalabas a tawen.
Kinunana nga idi laeng napalabas a bulan ket imbasura ti korte ti application for injunction nga inpila dagiti claimants tapno malapdan ti demolision kadagiti babbalayda.
Innayonna a gapu iti daytoy ket awan ti rason tapnu saan a maipatungpal ti demolition order ti mayor ti ili.
