BAGUIO CITY – Makitaripnong ti asosasyon dagiti stakeholders iti La Trinidad Vegetable Trading Post iti lokal a gobyerno ti La Trinidad, Benguet tapnu pagsaritaanda dagiti maipatpatungpal a health protocols iti trading centers sadiay.
Iti interview ti Bombo Radyo Baguio kenni Agot Balanoy, panakabagi ti liga dagiti asosasyon iti La Trinidad vegetable trading post, pakairamanan dagiti komboy seknan iti panagsuot ti face shield ken dagiti nasitar ket dagus wenno ‘on the spot’ a namulta.
Impettengna a saan a maiyannatop ti panagsuot ti face shield kadagiti komboy ken packers gaputa nadagsen dagiti bagbagkaten dagitoy nga ad-adda a mangparigat iti panag-angesda malaksid iti suot dagitoy a face mask.
Pinagyamananna met a kalpasan ti dagus a panagririda ket saan unay a nairtengan ti nasao a panagsitar dagiti pulis.
Inyunay-unayna pay a masursurot met ti panagaramat ti face mask, face shield ken panag-usar ti alcohol nupay inaklonna nga adda dagiti gundaway a saan a masursurot ti physical distancing sadiay.
Kabayatanna, impasigurado ti liga dagiti asosasyon iti la trinidad vegetable trading post a nakasaganada a mangipangag iti pakaseknan ti lokal a gobyerno ti La Trinidad iti maangay a dayalogo dagitoy.
Impetteng ni agot balanoy, panakangiwat ti liga a nupay kasapulan a maimplementar dagiti paglintegan kontra iti COVID-19, nasken met a praktikal dagiti polisiya tapnu maituloy latta dagiti aktibidad iti industriya ti nateng.
Sigun kenkuana, apektado ita dagiti mannalon gapu iti nababa a presyo dagiti nateng ken adu metten dagiti buyers manipud metro manila a simmardeng nga ag-angkat ti nateng ken adu dagiti buyers a saan a nakabaybayad iti inalada a nateng dagiti mannalon ken disposers.
Dinakamatna nga idi napalabas a lawas ket dumanonen iti P40-M ti gatad ti utang dagiti buyers kadagiti mannalon ken disposers iti la trinidad vegetable trading post.
Inyunay-unayna pay a no manayonan manen dagiti polisiya a manglapped iti panaggaraw dagiti nateng ket ad-adda a marigatan dagiti stakeholders iti vegetable industry.
