BAGUIO CITY – Nakumpiskar ti 130 a kahon ti traditional Chinese medicine a Lianhua Qingwen Jiaonang manipud iti pito a pwesto iti nagduduma a commercial establishments ditoy siudad ti Baguio iti kalman.
Resulta daytoy ti operasyon dagiti agents ti Food and Drug Administration (FDA) kadagiti nasao a pwesto a masarakan iti Maharlika Center, Palangdao Building ken iti Block Market.
Naamuan a dagiti nakumpiskar ket dagiti laeng display kadagiti nasao a pwesto.
Iti eksklusibo a panakiuman ti Bombo Radyo Baguio, dinakamat ni FDA North Luzon Cluster Director Gomel Gabuna a mailaklako dagiti nasao nga agas iti P150 agingga P350.
Sigun kenkuana, nagramot ti operasyonda kalpasan a nakaawat ti opisinada ti adu a reklamo mainaig iti presensia dagiti agas nga addaan ti surat ti Chinese.
Dagusda a nangipatungpal ti imbestigasyon ken sadiay a nakumpirmarda a mailaklako ditoy Baguio ti nasao a produkto.
Inyunay-unayna a saan a rehistrado ken awan ti approval ti FDA iti panaka-aramat ti nasao a produkto.
Kinunana a posible a mangitunda iti pagdaksan ti salun-at ti panagaramat iti saan a rehistrado nga agas.
Linawlawaganna met a nupay naaprobaran kas food supplement ti nasao nga agas, saan daytoy a mairekrekomendar a tumaren kas agas no awan ti reseta ti doktor.
Naamuan a naaramid dagiti nakumpiskar a drug product sadiay Hebei Province, China bayat a ti nakarehistro nga importer ket addaan ti operasyon sadiay Balintawak, Quezon City.
Sigun pay kenni Gabuna, pagpalawagenda dagiti agtagikua kadagiti pwesto a nakakumpiskaran dagiti nasao a traditional Chinese medicine ken posible a sumango dagitoy kadagiti kaso a panaglabsing iti Republic Act No. 9711 wenno ti Food and Drug Administration Act of 2009 ken ti Consumer Act of the Philippines.
Kabayatanna, nainget a binallaaganna ti publiko manipud iti panagaramat dagitoy kadagiti agas a maibagbaga a pangkontra iti COVID-19 a saan met a nakarehistro ken saan nga inaprobaran ti FDA.
Kinunana a nasken nga adda ti Certificate of Product Registration (CPR) dagiti mailaklako nga agas a mangpanpaneknek a dimmalan daytoy iti umno a proseso ken panagsukimat dagiti maseknan nga ahensia.
Innayonna a maysa a pakakitaan a naipaayan ti CPR dagiti agas a pangontra iti COVID-19 ti English translations a nailanad kadagiti agas a saan a nakita kadagiti nakumpiskar a Lianhua Drug Products.
Gapu iti daytoy, nabilin ti nainget a panagbantay dagiti lokal a gobierno ken law enforcement agencies iti nasaknap a panakailako dagiti unregistered ken unapproved drug products iti merkado ken iti online.
