BAGUIO CITY – Agpapaimbagen sadiay pagagasan ti 14 nga indibidual kalpasan a dinalapos dagitoy ti maysa nga SUV kabayatan ti panagbantayda iti lamay ti kabagianda idi malem kanikadua sadiay Purok 4, Bulanao, Tabuk City, Kalinga.
Nabigbig ti driver ti SUV a ni Aurora Amilig, 47-anyos, addaan asawa, self-employed ken residente ti Bulanao, Tabuk City, Kalinga.
Maibasar iti report, agbibiahe ti SUV iti provincial road idi aksidente a nadalaposna ti grupo dagiti biktima nga adda iti sangwanan ti balay a pakalamlamayan ti maysa a kabagian dagitoy.
Naamuan a sakbay pay ti insidente ket nakarikna ti driver iti killaat a panakatalimudaw isut gapuna a napukaw ti kontrolna iti manibela ti lugan.
Nabigbig dagiti nadangran a da Glory Lugao, 64; Victor Lugao, 64; Grandy Brioso, 29; Mayani Paga, 32; Gretel Paga, 6; Chedri Tomas, 23; Myla Langkit, 39; Bernabe Dangangao, 64; Felipe Oban, 73; Mario Andomang Jr., 48; Clarita Dongdongan, 69; Evelyn Contes, 66; Alfonso Walding, 46 ken David Bumakas, 64.
Boluntaryo met a simmuko ni Amilig iti istasyon ti pulisya.
Innayon pay ti pulisya a posible a maidalan iti bodong ti nasao nga insidente ngem mauray pay ti iruruar dagiti biktima manipud iti pagagasan.
