Impakaammo ti Department of Social Welfare and Development(DSWD) a mangrugi inton April 1 ket kasapulanen nga agiprisinta dagiti benepisyaryo ti Indigent Senior Citizens program (SocPen) iti National ID sakbay a makaawat dagitoy iti social pension.
Sigun iti nasao nga ahensya,paset daytoy ti panangpalawa ti gobyerno iti addang tapno mapagbalin ti National ID kas kangrunaan nga ID kadagiti amin a transaksyon.
Maipalagip nga iti sidong ti Expanded Senior Citizens Act of 2010 ket maipapaayan dagiti Pilipino nga agtawen iti 60 agpangato iti sag-sangaribo a piso iti tunggal bulan babaen iti DSWD.
Maipangpangruna iti daytoy dagiti addaan sakit, disabilidad ken dagiti nakapsoten ti pammagina.
Maibasar iti datos ti nasao nga ahensya, dumanon iti nasurok 4.1 million a senior citizen ti nakaawat ti pension babaen iti nasao a programa ngem inlawlawg ti nasao nga ahensya a saan nga amin a senior citizen ket kwalipikado.
