BAGUIO CITY – Boluntaryo a nagturong iti regional headquarter ti Police Regional Office Cordillera sadiay Camp Bado Dangwa, La Trinidad, Benguet ti 14 a barangay officials manipud Abra a nairaman iti kaudian a ‘narco list’ nga inruar ti Philippine Drug Enforcement Agency.
Kinadwaan dagitoy ni Abra Governor Maria Jocelyn Valera-Bernos kas panangipakitada iti panangsuportarda iti anti-illegal drug campaign ti Duterte Administration.
Iti panakisangoda kadagiti opisyales ti Cordillera PNP, inkari dagiti 14 a barangay officials ti siento porsiento a panangsuportarda iti nasao a kampanya ti gobyerno.
Sigun met kenni Bernos, boluntaryo a simmuko dagiti nasao a barangay officials a bukbuklen ti 5 a punong barangay ken 9 a barangay kagawad ken dagitoy ket agpapada a nangabak iti napalabas a barangay eleksion.
Dinakamatna a dumalan dagiti nasao a barangay officials iti umno a proseso kas iti profiling ken drug testing ken iti kanito nga agpositiboda iti drug test ket addan iti PNP no anya ti sumaruno nga addang.
Nupay kasta, linawlawaganna nga agtugaw latta iti posisyon dagiti nasao a barangay officials inton July 1 gaputa awan paylaeng ti desisyon ti korte no maikkat dagitoy.
Impeksana met ti tarigagayda a maisubli ti panagbalin a drug-free ti entero nga Abra isut gapuna nga ar-aramidenda ti amin tapnu madalusan ti probinsia dagitoy manipud iti iligal a droga.
Maipalagip nga iti kaudian a ‘narco list’ ket 24 kadagitoy ti nagtaud sadiay Abra ken 10 kadagitoy ti naabak iti napalabas nga eleksion.
