Dumanonen iti sangapulo ket uppat ti pimmusay bayat a walo pulo ket uppat ti nadangran iti panagdungpar iti dua a tren nga asideg idiay Jakarta, sigun iti operator a PT KAI.
Napasamak ti aksidente idiay Bekasi kalpasan nga immuna a dinungpar iti commuter train ti maysa a taxi iti riles sakbay daytoy a naidungpar iti long-distance train.
Kinumpirmar dagiti otoridad a nalpasen ti rescue operations, nu sadinno naannad a naiyakar dagiti pasahero a naipit kadagiti napirdi a bagon. Kaaduan kadagiti pimmusay ket manipod iti women-only carriage.
Imbilin metten ni President Prabowo Subianto ti imbestigasion ken inyebkasna iti panggepna a mangibangon iti flyover iti lugar tapno maliklikan ti kapada nga insidente.
Agtultuloy met nga im-imbestigaran iti National Transportation Safety Committee ti rason iti panagdinnungpar.
