Agtultuloy ti search operation nga ipatpatungpal dagiti rescuers para iti pannakabiruk dagiti 24 a pasahero ti maysa a passenger boat a limned sadiay Indonesia.
Sigun kadagiti otoridad, maysa ti kompirmado a pimmusay gapu iti insidente .
Iti inisyal nga imbestigasion, limned ti KM Nurul Salsa kalpasan a nadadaelan iti makina bayat ti panagdayasatna iti South Sulawesi Province idi Mierkoles, July 15.
Nagluganan daytoy ti 74 a pasahero ken tripulante, kasta met dagiti copra, baka ken motorsiklo.
Nasarakan dagiti rescuers ti 49 a nakalasat bayat nga agtultuloy ti panangbirokda kadagiti mapukpukaw.
Sigun kenni Muhammad Arif Anwar, head ti Makassar Search and Rescue Office, karit kadakuada ti sasaaden ti panawen a mangituntunda iti nangato a dalluyon ken napigsa nga angin.
