BAGUIO CITY – Naipaiman iti Provincial Environment and Natural Resources Office (PENRO) – Mt. Province ti 146 a nagduduma a pine lumbers a nasarakan dagiti otoridad iti watershed ti Barangay Dalican sadiay Bontoc, Mt. Province idi kanikadua.
Sigun kenni PSI Faith Igualdo, hepe ti Bontoc PNP, nakaawatda iti report seknan iti maatap nga iligal a panagpukan ti kayo iti nasao a lugar.
Dagusda a nagresponde, kaduada ti personnel ti PENRO, CENRO-Sabangan, dagiti Bantay Gubat ken dagiti Barangay Officials ti Dalican, Bontoc ken sadiay a nadanunda dagiti napanawan a naragadi a kaykayo.
Kinunana a sinawar dagiti otoridad ti nasao a lugar para iti panakakemmeg ken panakabigbig dagiti nagpukan kadagiti nakapempen a kayo ngem napaay dagitoy.
Innayonna nga agarup P26,500 ti pakabuklan a gatad dagiti narekober a kayo.
