BAGUIO CITY – Naibus ti 16,000 nga slice ti giant strawberry shortcake a naaramid sadiay La Trinidad, Benguet kas paset ti highlights ti 36th Strawberry Festival ti munisipio.
Sigun kenni Mayor Romeo Salda, dumanon met iti agarup 16,000 a tattao dagiti nagpila tapno gumatang iti nasao a cake a nailako iti P20 tunggal pisi.
Dagus a naibus dagiti nasao nga slices ken dumanon iti agarup P300,000 ti napaglakwan kadagitoy.
Naamuan a ti nasao a cake ket agtayag iti 8 a kadapan ken aglawa iti 12 a kapadan ken daytoy ket 3/4 iti kadakkel ti cake nga immunan nga inaramid ti munisipio a binigbig ti Guinness Book of World Records kas World’s Largest Strawberry Shortcake idi March 20, 2004.
Kabayatanna, balligi met ti pannakaipatungpal dagiti dadduma pay a kangrunaan nga aktibidad ti Strawberry Festival idi kalman kas iti parada dagiti non-motorized floats, street dancing competition ken drym and lyre competition.
