Impetteng ni Senator Francis “Chiz” Escudero, presiding officer ti Senate impeachment court a kasapulan ti 16 affirmative votes dagiti senator-judges tapno makumbiktar ni Vice President Sara Duterte iti impeachment trial.
Sigun kenni Escudero, nakalanad iti Konstitusyon a ti pangngeddeng iti maysa nga impeachment trial ket kasapulan ti panang-aprubar ti two-thirds a bilang dagiti miyembro ti Senado.
Gapu ta ti Senado ket bukbuklen ti 24 a miyembro, agtaltalinaed a 16 ti kasapulan nga affirmative votes uray pay adda dagiti senador a nasuspendir, sumangsango iti kaso ken saan a makapaset iti proceedings.
Inlawlawag ni Escudero a daytoy nga interpretasyon ket nakabasar iti nagbalin a desisyon ti Korte Suprema iti kaso ti Bayan v. Zamora idi 2000.
Iti nasao a kaso, binigbig ti korte ti two-thirds ti 24 a miyembro ti Senado katukad ti saan a bumaba iti 16 a botos uray 23 laeng a Senador ti agserserbi idi a panawen.
Inyunay-unay ni Escudero a ti linteg ken konstitusyon ti nasken a suroten ti amin a senador, aniaman ti personal opinion dagitoy.
Ginuyogoyna met dagiti senator-judges nga agbalinda a patas ken awan ti ikalkalinteganda iti panagdengngeg iti impeachment case.
Sakbay a nangrugi ti umuna nga impeachment trial ni Vice President Sara Duterte ita nga aldaw, Hulyo 6 ket pormal a nabotosan ni Escudero kas presiding officer ti impeachment court.
Nagkari met daytoy nga aywananna ti integridad ken surotenna ti umno a proseso agingga a malpas ti proceedings.
Sigun kenkuana, saanna a kiniddaw wenno inarapaap ti nasao a posisyon ngem nakasagana latta daytoy nga akemmen ti responsibilidad a naipaay kenkuana kas maitunos iti konstitusyon ken iti linteg.
