BAGUIO CITY – Sumangsango ita iti kaso a panaglabsing iti Presidential Decree 1602 wenno iti iligal a panagsugal ti 16 nga indibidual kalpasan a nakemmeg dagitoy iti nagsisina nga operasyon dagiti pulis kontra iti iligal a panagsugal sadiay Bangued, Abra.
Sigun kenni PCapt. Noel Bagtuna, hepe ti Bangued Municipal Police Station, naisayangkat dagiti tallo nga operasyon kadagiti barangay ti Zone 4, Zone 7 ken Sao-atan kas resulta iti panagrespondeda kadagiti impormasyon a naaw-awatda seknan iti manarimaan a panagsugsugal dagiti nasao a tattao.
Kinunana nga iti panagrespondeda ket nadanunan ken naaktuwanda ti panagsugsugal dagiti nasao nga indibidual wenno ti panagay-ayam dagitoy iti majhong, pusoy wenno rakatak ken tong-its.
Dinakamatna a nagresulta dagiti operasyon iti panakakemmeg ti walo nga indibidual sadiay Zone 4 ken iti sag-uppat nga indibidual sadiay Zone 7 ken Sao-atan ken iti panangkumpiskar dagiti otoridad kadagiti gambling paraphernalia ken taya.
Dagus a naiturong dagiti nakemmeg iti ospital para iti medico-legal examination sakbay a naiturongda iti istasyon ti pulisya ti Bangued para iti kaskenan a dokumentasyon.
Sigun kenni Capt. Bagtuna, uray adda ti piansa dagiti nasao nga indibidual iti sangsangwen dagitoy a kaso ket ipalpalagip latta ti pulisya ti panagtulnog dagiti umili kadagiti linteg ken pagalagadan a nainget a maipatpatungpal ita kagiddan ti krisis ken ti enhanced community quarantine nga intunda ti COVID-19 pandemic.
Naamuan pay a maysa kadagiti nakemmeg sadiay Barangay Sao-atan ket umawat kuma idi kalman iti tulong pinansial manipud iti Social Amelioration Program ti gobyerno.
